Plantun de Prouvènço

Pèr coumpara dos planto d'encò nostre

Velezia rigida & Trisetum flavescens

Velezia rigida

Caryophyllaceae

Nom en français : Vélézie rigide.

Descripcioun :
La velezìo es uno pichoto planto rede e pegouso que porto de flour roso mistoulino. Èi pas eisa de la vèire entre li mato de bauco ! Planto pulèu raro, trachis dins li tepiero seco argilouso e sablouso. Lou "calice" èi proun long e pièi caup lou fru de la memo taio.

Usanço :
Couneissèn pas d'usanço particuliero pèr aquelo planto. Escriéure au site se n'en sabès mai.

Port : Erbo
Taio : 5 à 15 cm
Fueio : óupousado
Tipe bioulougico : Teroufite
Cicle bioulougico : Planto de l'an

Gènre : Velezia
Famiho : Caryophyllaceae

Ordre : Caryophyllales

Coulour de la flour : Roso
Petalo : 5
Ø (o loungour) flour : 4 mm
Flourido : Printèms

Sòu : Ca
Autour basso e auto : 0 à 600 m
Aparado : Noun
Mai à jun

Liò : Tepiero seco - Roucaio
Estànci : Mesoumediterran à Subremediterran
Couroulougi : Mediterrano-Touranenco
Ref. sc. : Velezia rigida L., 1753

Civadoun

Trisetum flavescens

Poaceae Graminaceae

Noms en français : Avoine dorée, Avoine jaunâtre.

Descripcioun :
Lou civadoun douno d'èr à uno pichouno civado emé si pichòtis espigueto (5 à 8 mm) coulour de fen seca que caupon dos à quatre flour. L'enflourejado èi di proun daurado e esbrihanto un cop maduro. Se recounèis peréu i glumo de dessouto que soun mai courteto e estrecho qu'aquéli de dessubre. Li lemma porton de lònguis arèsto estacado dessouto li tres pèr dos (fotò), e emé un couide.

Usanço :
Lou civadoun pòu douna encò li fedo, la "caucinoso pulmounàri enzououtico", valènt-à-dire la fourmacioun de teissu fibrous dins li poumoun. Pèr acò dèu pas èstre vist coume uno planto pasturiero.